Separa di e director di DIMAS, un hurista cu mas di un decada di experiencia na cabes di e departamento, desde awo un trahado tambe a haya e mesun autoridad pa firma pa duna permiso, sea cu e director t’ey of no. “Un trahado sin e educacion necesario awo a haya mesun poder cu e director, mustrando cu e minister kier tin mas di bisa den otorgamento di permiso”, asina lider di Accion21, Miguel Mansur, a denuncia ayera merdia durante Enfoke. El a critica cu e mesun trahado aki, cu defunto minister Rudy Croes a tuma como bode, awe tin e mesun poder cu e director!
Mario Wever tin e suerte di semper haya sosten di e minister na mando, door di coopera cu su maneho di tal forma cu e mandatario ta dun’e cierto poder pa e por firma, hasta ora cu e minister of coordinadornan di dje pidi pa haci tal. E minister, cu apenas a haya e cartera di integracion y labor hunto, a opta asina pa e tin un liña directo na e proceso di firmamento di permiso, pasando riba cabes di e director di un forma “legal”.
Parlamentario Miguel Mansur a critica e minister pa e forma con e ta anda den DIMAS pasobra trahadonan ta masha disgusta cu e decision aki. Ta mas cu cla e hecho cu e mandatario kier mete den proceso di permiso di estadia y di trabou, canando riba un liña imaginatorio, cu den pasado a hinca dos ex-minister caba den basta problema cu husticia. Pa e relato completo, lesa e edicion di TREMPAN di awe.