Aruba a saca cara den reunion importante na Hulanda

Relaciona cu e desmantelacion di Antiyas Hulandes despues di dies aña, a tuma luga un congreso na Hulanda. P’esaki e fraccionnan den parlamento a asisti. A biaha, parlamentario; Setty Yarzagaray di MEP, Shailiny Tromp-Lee di MEP, Miguel Mansur di Accion21, Misha Raymond di RAIZ, Marisol Lopez-Tromp di MAS,  Gerlien Croes di AVP y Edgard Vrolijk.

Griffier di Parlamento di Aruba, mr. Herman Hek tambe a forma parti di e delegacion. A keda un siman na tera friu pa atende diferente reunion y e congreso mes.

E parlamentarionan a reuni cu e delegacionnan di St. Maarten, Corsou, Saba, St. Eustatius y di Hulanda. A papia riba con e relacion ta despues di dies aña cu no tin un Antias Hulandes mas. Pa e parlamentarionan di Aruba, e biahe tabata uno sumamente importante. A debati riba diferente punto, a haci pregunta y hasta intercambia pensamento.

A debati fuertemente riba e statuut di Reino. Tin parlamentario cu a hasta reuni cu cierto diplomatico pa atende cu tema nan manera Union Europeo y mas.

A bishita diferente organisacion importante, manera Raad van State y Aruba Huis. A puntra Misha Raymond di RAIZ riba e punto cu; pueblo di Aruba no necesariamente a aproba nan biahe pa Hulanda, mirando cu ta den pleno crisis na Aruba y un delegacion ta biaha pa Hulanda. Raymond a splica cu; e biaha tabata planea di hopi tempo, a hasta kere cu lo cancel’e mirando e medidanan na Hulanda.