Na un forma sorpresivo y inespera, e politico Miguel Mansur, lider di partido Accion 21 a anuncia awe cu na su parecer, Ursell Arends y Geoffrey Wever di partido RAIZ ta mas MEP cu Evelyn Wever mes, cu ta lider di e partido mas grandi di Aruba. E opinion ey a hala masha atencion awe merdia durante e noticiero mas scucha y mira na Aruba, esta ENFOKE, presenta pa Nelson Andreade y Patrick Paskel via Bo Guia 88.9 FM y riba 24ora.com. E parlamentario tabata invitado den studio y a los e opinion ey di su dos coleganan den parlamento.
Na opinion di Miguel Mansur, tin mucho evento politico y momentonan cu a transcuri den cual e por a yega na e opinion ey di su dos coleganan di parlamento. Na defensa di ex-abogado mr. Geoffrey Wever, a bisa Mansur cu kisas Ursell Arends, kisas pasobra e ta mas cerca di e proceso di formacion banda di lider di MEP, cu kisas e por fomenta e percepcion cu el a haya di dje awo. Pero cu den caso di Wever, no ta sintiendo esey.
Miguel Mansur a contesta cu “Geoffrey Wever ta mas inteligente, dus e ta sconde miho of ta haci e postura ey. Pero, di loke ma wak awo, no di postura so, sino realmente di acto, dus Geofffey a priminti por ehempel di lo tuma contacto cu nos, esaki t’e prome weekend despues di eleccion, pa combersa. Nunca mas”. E lider di Accion21 ta considera e tipo di actitudnan asina, ta confirma su opinion riba e dosnan aki, pues tanto Ursell Arends como Geoffrey Wever, di tabata y ta liga directamente cu partido MEP, djis cu nan ta strategicamente riba un otro partido politico.
Mas leu, pa mustra cu locual e formado ta purba aparenta, cu esey no ta corecto, ta por ehempel e fecha pa huramenta gobierno. Den parlamento ta scuchando cu formacion ta mal pega ainda, specialmente internamente den MEP no ta sigur ainda kende lo bira minister y kende no ta ministeriabel, debi na un sospechonan negativo. Ainda tin “rancamento di ciboyo” interno pa dicidi cuanto minister MEP lo drenta Conseho di Minister cu ne y despues pa dicidi cuanto minister e Conseho di Minister lo tin den e siguiente coalicion. Esun di MEP-POR-RED tabatin ocho y tur hende a spera cu awor cu tin dos fraccion so, cu lo bah’e na shete bek. Pero tin tur indicacion cu esey lo no ta realisabel, debi na presion interno.
Un di nan cu ainda no sa den ki funcion e lo keda, ta Edgard Vrolijk di MEP. Ainda e ta pendiente riba liderazgo di MEP pa sa si e lo bira Minister di Enseñansa, of e lo keda Presidente di Parlamento of si e lo baha bira djis un Parlamentario. “Ta tur kier bira minister”, asina Miguel Mansur a bisa hariendo duro durante e noticiero. Esey ta duna contenido na e rumor cu formado a manda 10 nomber pa screen pa bira minister, pues cu dos nomber di “spare”.
Presidente di Parlamento, mr. Edgard Vrolijk, a sigura cu e reunionnan interparlamentario ta continua entre 20 pa 26 di augustus na Boneiro. Ta trata aki di e reunionnan conoci como Interparlementair Koninkrijksoverleg (IPKO). Tur aña na januari y na juni, e parlamentonan di Hulanda, Aruba, Corsou y Sint Maarten ta topa cu otro. Na januari ta topa den Caribe Hulandes y na juni na Hulanda. Pero door di Coronavirus, e reunion na juni 2020 y januari 2021 a tuma luga den forma virtual. Pero esun awor aki na augustus lo tuma luga na Boneiro.
Consecuentemente a prepara un delegacion di e cinco fraccionnan pa participa na e reunion, den representacion di Parlamento di Aruba. Lo atende parlamentarionan di MEP, AVP, RAIZ, Accion21 y MAS. Ora Miguel Mansur di Accion 21 a puntra presidente di Parlamento ken lo atende e reunion pa RAIZ, el a contesta cu lo ta Geoffrey Wever. Bisando esey, Mansur ta convenci e ora cu formacion di gobierno hamas lo keda cla prome cu 27 di augustus, ora cu e delegacion regresa nos isla for di Boneiro. Of cu Wever a opta pa no tuma un funcion di minister den e siguiente gabinete.
Miguel Mansur di Accion 21 a hacie hopi cla durante su entrevista awe cu ya caba, ta bisto pa tur hende, cu desde RAIZ a forma cu MEP, incluso hasta prome cu eleccion, cu nan actitud a cambia. A haci tur lo posibel pa por a tene un reunion entre Accion 21, RAIZ y MAS pero RAIZ a nenga y mesora a core firma un acuerdo intencional cu MEP. Y e forma con awo e ta actuando tambe ta convence e politico nobo aki cu tanto Ursell Arends como Geoffrey Wever ta mas MEP cu Evelyn Wever-Croes mes!