Miguel Mansur (Accion 21): Ta iresponsabel pa sigui gasta placa sin un presupuesto

Recientemente mr. Andin Bikker, minister di Husticia demisionario, a bin parlamento pidi conseho na parlamento, tocante algun training y lease/compra di algun material pa cierto departamentonan cu ta cay bou di dje. 

Miguel Mansur, parlamentario pa Accion 21 a trece dilanti cu no por gasta placa cu no tin. Sin presupuesto dificil pa tin un bista ariba tur e cosnan ey, como tambe hopi iresponsabel. Specialmente pa e wagonnan pa Brandweer, cu segun nota di minister Bikker, lo ta un lease di 100 mil florin pa luna. Ta papia aki cu Land Aruba ta bay gasta 4.5 miyon na wagon, cu tin un balor di 2.7 miyon den 5 aña di leasing. 

E manera cu a maneha e pais aki den e ultimo 20 añanan, no por sigui. Ta di lamenta cu fraccion di RAIZ a bay di acuerdo cu esaki, sin un presupuesto aproba tur cos. E ta mustra cu e li@anan ta hopi cla.

RAIZ y MEP a firma un intencion di gobernacion na California Lighthouse, unda cu na 1891 un barco di nomber California a zink eynan. Y Mansur ta den Parlamento pa evita pa no sigui haci esaki cu nos finanza publico. 

Mas aleu, Mansur a bisa cu tur e gobiernonan di Aruba, a zink nos finansa publico y awo ta purba pa no sigui zink e finanzas publico. Pero al parecer parlamento ta ‘business as usual’. Land Aruba no tin placa, e tin un acuero cu Hulanda. Ainda nan no a wak un solucion innovativo cu ta bay coregi esaki, cu ta bay tin placa pa enseñansa, salubridad y e Sociaal Crisisplan, etc. 

Den fin di siman por a wak den medionan di comunicacion, por a tuma nota di autonan di basta placa, cu fondonan di Hulanda. Riba esaki, Miguel Mansur, parlamentario di Accion 21 no kier a bisa mucho. Kisas Bikker tin bon intencion, y finansa no ta su punto fuerte. Pero ta iresponsabel pa bin parlamento pa pidi aprobacion di parlamento, mirando cu ainda no tin ni presupuesto.