Recientemente Parlamento a ricibi proposicion di cambio den e ley Landsverordening voorzieningen gewezen politieke ambtsdragers en hun nabestaanden (AB 2010 no. 91). Miguel Mansur di fraccion Accion21 a manda pregunta pa inclui den e verslag cuestionando pakico gobierno a dicidi di prioritisa e ley aki na un momento asina inoportuno. Den consideracion di e cambionan proponi, e parlamentario awor kier ricibi contesta por escrito for di minister prome cu e tratamento mes di e ley aki.
Miembro di Parlamento, Miguel J. Mansur, a manda un total di shete pregunta na Minister di Finansas, Economia y Cultura, mr. Xiomara Maduro, conforme articulo III.17 di Staatsregeling y conforme artikel 59 di Reglement van Orde van de Staten van Aruba.
E preguntanan ta encera cu si minister por elabora si e diestres (13) parlamentarionan cu a bin na remarca pa overbrugginstoelage a cobra esaki caba na juli 2021? Si esaki ta e caso por splica riba ki base legal a efectua e pagonan? Parlamentario Mansur kier sa tambe si acaso e overbrugginstoelage a wordo paga contra ley, si Minister Maduro por a comparti e opdracht cu Directie Financien a ricibi pa efectua dicho pagonan?
Di acuerdo cu Miguel Mansur (Accion21), si e pagonan a wordo efectua pa eror, minister y/of Directie Financien a haci algun esfuerso pa recupera e fondonan paga aki cu tabata sin base legal? Tambe, si e pagonan a wordo efectua cu autorisacion di minister of Directie Financien,
pakico e instruccion a wordo duna na 2021 cu inauguracion di Parlamento diesun (11) contrario na den pasado cu semper e pagonan a wordo efectua segun e landsverordening, o sea cuminsando desde e prome dia di e luna siguiente di nan retiro?
Miguel Mansur kier sa si Minister Maduro mes ta kere cu eherce pagonan contra ley ta cuadra cu un maneho responsabel segun ley y good corporate governance. E kier pa minister y/of Directie Financien aclaria si den pasado a emiti otro opdracht/autorisacion pa efectua pagonan contra ley of sin base legal? Si esaki ta afirmativo, por a comparti dicho opdrachtnan cu parlamento?
Y por ultimo, parlamentario Miguel Mansur ta puntra si parlamento no aproba e cambionan proponi den e ley Landsverordening voorzieningen gewezen politieke ambtsdragers en hun nabestaanden, cu si minister Xiomara Maduro ta prepara pa para responsabel personalmente pa e suma cu Land Aruba a paga sin base legal?
Parlamentario Miguel Mansur ta spera di ricibi contesta por escrito mas pronto posibel di Minister Xiomara Maduro riba tur su preguntanan aki y si ta posibel prome cu tratamento di e ley aki door di Parlamento.
Loading…
Reload document 
Open in new tab 
