Awe mainta a tuma luga e continuacion di e proceso di screening dje ministernan. Den esaki, tres miembro di oposicion lo a entrega un carta protestando cu pa haci di esaki un reunion informativo enbes di un reunion publico. Sinembargo, tres parlamentario di MEP a para pa tene un ‘openbare bijeenkomst’. Lider di fraccion Accion 21, Miguel Mansur, a splica cu a yega ora pa desenmascara e circo cu a sosode awe.
Pues segun Mansur, e tres parlamentarionan aki no tin base di integridad ni transparencia nengando e reunion publico. Presidente di parlamento a informa cu oposicion tabatin dos siman pa haci e peticion aki di cual Mansur a bisa cu no tabata e caso. Asina el a informa cu oposicion a haya splicacion cu no tin base legal pa un reunion publico. Aki pues no lo tin un di dos ronde y parlamento no por bay haci ningun pregunta na e ministernan. Segun Mansur, coalicion a structura un reunion den cual nan a presenta locual nan kier y parlamento no tabatin espacio pa hiba palabra.
Asina tambe, el a splica cu un tema cu a keda bin dilanti tabata esun di e ley di screening y cu e ministernan tabata keda bisa “si e ley pasa”, pero segun Mansur “si bo ta formando un gobierno di diesun bo no ta den e posicion pa bisa ningun hende no”. Mansur a splica cu e unico manera cu e ley di screening lo haya su balor den futuro ta si formado no forma parti di e gabinete y ta un persona independiente.
Pa cobertura mas amplio lesa edicion di TREMPAN mañan.
