Durante e reunion di Parlamento riba BBO na Frontera, Accion 21 cu su miembro Miguel Mansur, a entrega un mocion di desconfiansa cu apoyo di e representante di partido MAS Aquanette Gunn. Esaki pa motibo cu Aruba ta bay un direccion unda cu ta suta pueblo cu medida y Gobierno ta sigui gasta placa. Cu coalicion ta bay vota na fabor di un ley cu Hulanda a pusha riba Gobierno di Aruba ta algo cu no a straña e parlamentario di Accion21. P’esey e fraccion di Accion21, MAS y e miembronan independiente a dicidi di bini cu e mocion di desconfiansa.
Mansur mester hari ora cu e recorda cu Minister a dicidi pa yama pa bibo, y a bisa cu el a lubida cu menos cu un aña e tabata bou menasa di un aanwijzing pa su maneho. A tira den su cara di biaha cu e surplus cu tanto e ta gaba, tabata basa riba un maneho di Profesor Gradus ora cu el a conseha un KB na Conseho di Minister di Reino. A mustr’e cu gastonan di interes ta sigui subi pasobra nan ta madura na un averahe di 5.3% di interes riba mercado internacional y ta wordo refinancia na 6.5% riba mercado local.
Ta parce, el a bisa, cu e hendenan aki no ta siña mas. Nan ta lubida cu e motibo di aanwijzing tabata pasobra gastonan di Gobierno ta subiendo, mientras cu gastonan di Gobierno di 2023 pa presupuesto 2024 a subi mas cu 100 miyon florin, mas o menos 30 miyon ta gastonan di interest. Esaki pa motibo cu ta refinancia na un interest mas halto, en bes di bay di acuerdo cu e Raft. Gastonan di producto y servicio y di personal a bolbe subi. “E mesun foutnan cu a conduci na e aanwijzing di 2022 ta ripiti nan. Esaki tabata motibo pa e mocion di desconfiansa. Lamentablemente e no a haya apoyo di Parlamento y lo por spera mas di e mesun cosnan aki. Esta mal maneho, atake personal, e direccion cu nos no mester bay aden.”
