Diferente candidato a bandona partido AVP. Algun lo keda den arena politico, mientras cu otronan probablemente lo sigui den otro sector. Pero tambe tin politico cu a bolbe bek, manera Otmar Oduber. Pa e partidonan existente, esaki por ta un adkisicion, dependiendo di e filosofia. Den caso di Accion21 e lider, Miguel Mansur, ta conseha e candidatonan cu miho ta pa uni na un partido existente en bes cu cada un ta bay lanta un partido nobo.
“Ningun combersacion a tuma luga, pero nos ta mira hopi movecion riba panorama politico. Nos ta mira partidonan politico nobo, otro ta bolbe den politica.”
Den cuadro di e tema aki Mansur ta bisa cu tur hende mester compronde si cu mas partido participa den un eleccion, menos probabel e cambio lo ta. Simplemente mester mira e situacion di Corsou. Den e ultimo eleccion tabatin hopi partido y a keda 9 restzetel.
E ta conseha esnan cu ta cuminsa of ta nobo den politica y kier un cambio of miho pa pueblo di Aruba, nan pensa di uni na un partido existente.
Den caso di Gerlien Croes, kende a bandona AVP, el a conta cu semper e tabatin un bon relacion di trabou cu ne. Tin confiansa y esey no a cambia. Y den oposicion a traha bon cu otro. Si Gerlien lanta su mesun partido, kisas esnan cu kier drenta politico lo mira esey como un bon caminda. El a menciona Daphne Lejuez cu kisas lo ta interesa pa bolbe pero tambe Mervin Wyatt Ras. “Di dje mi no sa kico su plannan ta den futuro. Si e keda den politico, probablemente e lo keda cu su actual partido. E ta un persona hopi amabel y semper tabata un placer pa traha cu ne.”
Cu ex-integrantenan di e partido Accion21, e no ta mira cu lo traha hunto bek. E tabata un mal experiencia y kisas ta e caracternan no a sali bon cu otro. Pero si e por bisa cu Daphne Lejuez ta un persona inteligente y trahado, pero den e partido e no a funciona.
Pa loke ta Otmar Oduber, Mansur a desmenti di a acerca e persona aki pa uni na Accion21. Ni por medio di intermediario tampoco.
Cu tur respet pa logronan di Oduber, e ultimo aki ta custumbra cu cierto tipo di politica. Por ehempel, Otmar Oduber ta papia cu mester uni pa bringa Hulanda. “Bringa Hulanda pakico,” e ta puntra.
Accion21 den su plan traha ta poni bon cla cu kier renobacion den politica na Aruba. Por ehempel, kier un limitacion den e termino cu un politico por sinta. Oduber tin merito pa loke el haci, pero e tin acusacion contra dje y ainda e ta un sospechoso. Esey so caba ta haci dificil pa cualkier partido acept’e. “Pero nos mes di Accion21 ta kere den un politica nobo, esunnan di futuro. E ultimo generacion, cu no ta mancha manera esunnan di ultimo 20 añanan cu a hiba un finanza desastroso pa nos pais. Tin suficiente talento hoben y esey ta e futuro di e pais y politica cu nos kier trece.”
