Miguel Mansur: Aruba mester ta miho prepara pa IPKO den futuro

Na e ciere di e Consulta Interparlamentario di Reino (IPKO) diaranson atardi na Boneiro, parlamentario Miguel Mansur di partido Accion 21 a comparti cu 24ora un analisis breve di e encuentro. Tras numera avancenan den representacion consular, infrastructura economico y un ley caminda cada ciudadano Hulandes tin derecho pa habri un cuenta di banco na Hulanda cu e obhetivo di fomenta e-commerce den reino, e politico hoben a reflexiona tambe riba e areanan caminda tin espacio pa mehoracion. 

Un punto cu e parlamentario di Accion 21 kier boga p’e ta un miho preparacion como delegacion prome cu ta yega na IPKO. Di e manera aki tur representante di Aruba ta riba mesun pagina y por optimalisa e manera con ta presenta e puntonan cu ta di importancia pa nos isla na e demas partner den Reino, specialmente Hulanda.

Como partido nobo, Accion 21 a bay den buskeda di aliadonan cu ta comparti mesun vision y posicion riba temanan primordial.