Miguel Mansur, lider di e partido den Parlamento Accion21, no ta mira cu e Rijkswet Aruba financiel toezicht (RAft) ta algo malo. E sigur no ta mira cu esaki ta un forma cu ta kita autonomia di e isla. SI ta p’esey, anto mester cobra e dos partidonan aki e mas cu 32 mil florin extra na interes cu esaki ta costa pa cada Arubiano.
Pa tur hende por compronde bon, Mansur a duna un splicacion simpel di un persona cu pa e core rond, mester di un auto, rijbewijs y sigui leynan di e pais. E RAft no ta kita un persona su rijbewijs ni su auto. Solamente e ta pone un chip riba e auto y ni kico bo haci, primi duro riba e pedal, bo no por pasa 100 KM pa ora. “Bo por move bay unda cu bo kier. E bendemento di RAft como algo teribel pa e pais, ta un mentira.”
Asina cu e politico mira partidonan tradicional bisa cu mester bringa Hulanda, e ta mira esey como prome triki den politica. Ta crea un enemigo di pafo, riba cual e pueblo ta bay enfoca en bes di mira loke e partidonan tradicionalista aki mes ta haci.
Awo por mira cu loke e Gobierno di mr. Evelyn Wever-Croes ta haciendo ta pa aumentando gastonan di Gobierno cu 110 miyon florin adicional.
Awo cu ta preparando pa trata presupuesto 2024, el a pensa sigur cu nan lo trata di mantene e gastonan na mesun nivel, mirando e necesidad den y bou di e pueblo, “pero ta parce cu nan no tin gevoel mas. No solamente Goederen en Diensten, pero tambe di personal.”
E RAft, e ta splica, simplemente ta bisa cu si bo tin un debe di riba 40%, mester produci un surplus di un porciento. Esaki cualkier Gobierno responsabel lo haci’e toch, pero na Aruba e no t’asina.
E ley ta bisa cu pa 2040 mester baha bo debe te na 50% di bo GDP (Gross Domestic Product, o sea Producto Domestico Bruto), mientras cu awo e ta rond di 80 y 90 porciento. “Kisas por bisa cu esaki ta mucho ambicioso.”
Pero tambe e ta crea normanan manera cu e gasto di personal no por ta mas cu 10% di bo GDP. Pa AVP y MEP, esaki ta un problema. “Principalmente MEP cu den 2001 pa 2009 a gana eleccion y a yena sector publico cu ambtenaar. Simplemente pa haya voto. Pero si e RAft t’ey e Gobierno no por haci nada di esey mas. Ningun partido por haci esey mas. P’esey ta en contra pasobra di e forma ey tabata gaña pueblo y gana eleccion, cu a hinca nos den e buraco financiero cu nos ta.”
Di otro banda e politico a sigura cu RAft no ta algo pa semper, pasobra despues di tres aña sigui cu presupuesto a cumpli cu tur e normanan, por kit’e. Cumpliendo tambe cu e condicion cu debe mester ta bou di 50% pa 2040 y mester ancla den Constitucion un provision cu AVP mes a yega di propone. Esta cu ta hancra den Constitucion cu e normanan aki ta sigui y si desvia di e normanan aki, mester tin aprobacion di dos tercera parti di Parlamento. Pues tanto coalicion como oposicion.
Mansur kier sa for di un persona kico Aruba ta perde si pasa e RAft, pasobra e no ta mira nada di esey.
