Diahuebs ta tumando luga un reunion publico cu a toca varios tema entre otro riba instalacion di comision fiho den parlamento y tambe despues parti atardi lo trata e parti di presupuesto di DOW.
Awe a dicidi pa stipula e comisionnan fiho den parlamento. Por a sinti caminda cu varios caminda oposicion a purba di haya un ke otro posicion pa presidencia, sinembargo esaki no a logra.
Lider di fraccion Accion 21, Miguel Mansur, a menciona cu tin dos punto cu a trece dilanti. Mansur mes a bin cu un proposicion pa reorganisa algun di e comisionnan. Pero mester ta realistico.
E herment mas poderoso cu parlamento tin, ta e respectivo comisionnan. Ta eynan e minister y directornan di departamento ta bin duna cuenta.
Na prome luga Mansur a spera cu un parlamento nobo y partido nobo lo a organisa e comisionnan segun area di experticio, cu tin tendencia entre e carteranan cu ta relaciona cu otro.
Por ehempel e reto mas grandi cu e pais tin ta finansa. A dicidi pa organisa e comision di parlamento cu ta finansa, organisacion gubernamental, deporte y cultura.
Deporte y cultura no tin di haber cu finansa. Si kier mira un parlamento activo, bibo, yudando y controlando gobierno, mester organisa nan di manera cu ta logico a base di sentido comun.
Por a mira cu oposicion a pidi pa reorganisacion, pa pone deporte hunto cu salubridad publico, pone cultura hunto cu enseñansa, loke cu Departamento di Cultura ta pidiendo.
Loke a haci ta concretisa e Stempelparlement.
Tambe lider di MAS, Marisol Lopez-Tromp a trece dilanti cu e coalicion a coy tanto presidencia y vice-presidencia di tur e comisionnan. Realmente ora tin un parlamento cu kier bay traha hunto of si kier traha riba independisacion di parlamento, si kier traha riba modernisacion of cambio den reglement van orde, mester di ⅔ parti.
Por a tende lider di fraccion di MEP bisa cu nan tin 11 profesional, hecho cu Mansur no a cuestiona. Por ta nan ta profesional den nan area di experticio. Pero no pa ta den presidencia di e comision ey. Tin miho talento den parlamento y ta prefera pa mira parlamento traha uni a base di capacidad, pa asina nan por haci nan trabao y representa pueblo miho di e manera ey.
Pa cobertura mas amplio lesa edicion di TREMPAN mañan.
