E eleccion aki tabata uno hopi special, pasobra tabatin un total di 12 partido cu a participa den dje. Pero loke ta haci e eleccion aki mas special ainda, ta cu e partido Accion 21, cu apenas tin algun luna di existencia, a sa di yega bin y forma un asiento, birando asina un sorpresa hasta pa e partidonan mas grandi.
Lider di e partido Miguel Mansur a gradici na pueblo henter di parti di tur candidato cu a traha hopi duro. Nan ta gradicido pa e confiansa deposita den Accion 21.
Mansur ta spera cu Accion 21, RAIZ y MAS por reuni y wak con por hiba Aruba dilanti. Despues bay negosha cu e partidonan grandi.
E dos partidonan tin nan bentaha y desbentaha.
Accion 21 ta para riba su plan y su principionan, como tambe loke nan kier trece dilanti cual ta reforma fiscal y otro puntonan manera igualdad.
E manera di campaña tradicional no a realmente duna e resultado. Di parti di Accion 21, kier a mira seis asiento keda for di politica tradicional. Pero ta miho awor aki y ta bayendo den e bon caminda.
Mansur ta kere cu den futuro lo sigui mira esey. Ta spera cu den e debate tur lider politico cu tabat’ey a compromete nan mes na modernisa e kiesverordening. Ta spera cu lo cumpli cu esey pa tin eleccionnan mas democratico pa tur voto conta igual.
Di parti di parlamentario independiente Daphne Lejuez, el a splica cu e ta hopi contento y satisfecho, mirando cu un partido den tres luna, sin bandera, sin borchi, sin T-shirt, sin pechi, si nada, a logra toch un asiento. E ta remarcabel. Lejuez ta gradici tur hende cu a duna nan sosten y tur e candidatonan cu por a logra esaki.
Awo tin cu hiba combersacionnan pa mira kico lo bay pasa.
