Diahuebs den oranan di atardi a introduci e ministernan di gabinete Wever-Croes II. Un di e ministernan nombra, cu por cierto ta ocupa e cartera di entre otro husticia, ta Rocco Tjon. Tin cu subraya cu e nombracion aki a causa basta consternacion den comunidad, entre otro cerca e plataforma ‘Ta Basta’ cu ta lucha contra abuso sexual di menor, cu a tambe a boga pa screening di minister.
Riba e nombracion aki, parlamentario y lider di fraccion Accion21, Miguel Mansur a comenta riba un ponencia expresa pa Ursell Arends kende a bisa cu esaki ta e gobierno cu Aruba a scoge. Segun Mansur, esaki no ta e caso y cu ta solamente 44%, di e pais, pues un minoria, a vota pa e gobierno MEP-RAIZ. Tambe segun Mansur, prome minister mr. Evelyn Wever-Croes a bisa cu e no lo defrauda confiansa di henter comunidad pero cu realidad ta cu el a haci esaki caba ya cu ta prome biaha den historia cu ta inaugura un gobierno cu menos voto cu oposicion.
Mansur a bisa cu si wak e ministernan mes, por tuma nota di “ministernan bakia den nepotismo, nos ta wak ministernan acusa di abuso di mucha, nos ta wak ministernan acusa di a saca menor di edad na estado, nos ta wak minister acusa di malversacion di placa y minister acusa di abuso di poder”. Asina e parlamentario a bisa cu realmente e ta babuca cu esaki ta e miho talento cu Aruba por ofrece.
Pa cobertura mas amplio lesa edicion di TREMPAN mañan.
